Náttúrunnar glímutök

Nikol Hasler er þriggja barna móðir í smábænum Waukesha en líklega með frægari íbúum Wisconsin fylkis. Nikol lærði á eigin skinni hvað það getur kostað að vera illa að sér um kynlíf og varð ólétt skömmu áður en hún átti að hefja háskólanám. Að eigin sögn var getnaðarvörnin sem hún notaði „að kippa honum út og leggjast á bæn“ og eignaðist hún fyrstu tvö börnin sín þannig.

Nikol stýrir í dag þættinum Midwest Teen Sex Show sem hefur slegið rækilega í gegn á netinu enda leitun að skemmtilegri og hispurslausari kynfræðslu, og eflaust leitun að almennilegri kynfræðslu yfir höfuð í miðvesturríkjum Bandaríkjanna.

Allt sem þú vilt vita

Midwest Teen Sex Show hefur í 17 þáttum fjallað um ótrúlegustu hluti sem við koma kynlífi og kynferði. Meðal þess sem tekið hefur verið til umfjöllunar er sjálfsfróun kvenna og karla, skírlífi, getnaðarvarnir, samkynhneigð, spéhræðsla, endaþarmsmök, klám og munnmök.

Allt er þetta borið á borð af einstakri hreinskilni og vænum skammti af húmor hrært saman við. Nikol og félagar svara öllum þeim spurningum sem enginn myndi þora að spyrja í kynfræðslutíma og útkoman er þáttur sem bæði getur frætt og skemmt unglingum og fullorðnum.

„Við vitum að mörg ykkar þarna úti eru að stunda óvarið kynlíf, svo hættið því! Hafið þið einhverntíma séð barn? Þau eru heimsk, vita ekkert og þú þarft að gefa þeim að borða a.m.k. einu sinni á dag. Reynum að koma í veg fyrir börn.“ Þannig hefst umfjöllunin um getnaðarvarnir og er ágætis dæmi um þann lauflétta blæ sem er yfir þáttunum og allir geta haft gaman af, jafnt unglingar sem fullorðnir.