Allt í fína hjá Jolie og Pitt

Leikaraparið Brad Pitt og Angelina Jolie eru enn saman. Þetta hafa þau ítrekað vegna frétta af því að svo sé ekki.

Jolie ól tvíbura fyrir um tveim mánuðum og allt er í lukkunnar velstandi. Jolie og Pitt ákváðu að senda frá sér yfirlýsingu í kjölfar rangra frétta af einkalífi þeirra. Pitt hefur verið á flakki um heiminn undanfarinn mánuð og hefur sótt kvikmyndahátíðir en Jolie dvalið á heimili þeirra í Frakklandi.

Slúðrið breiðist að venju hratt út. Pitt og fyrrverandi eiginkona hans, Jennifer Aniston, sóttu bæði kvikmyndahátíðina í Toronto og spruttu þá fram slúðurfréttir um að þau hefðu hist og snætt saman hádegisverð þar í borg. Þá flutti tímarit fréttir af því að Jolie væri haldin fæðingarþunglyndi og það hefði reynt á samband þeirra Pitt. Það ku hins vegar vera skothelt.