„Samningurinn Guy, samningurinn”

Söngkonan Madonna og eiginmaður hennar kvikmyndaleikstjórinn Guy Ritchie eru sögð hafa gert með sér hjónabandssáttmála eftir að hafa leitað til hjónabandsráðgjafa fyrir tveimur árum. Hjónin tilkynntu fyrir tveimur vikum að þau hefðu ákveðið að skilja eftir átta ára hjónaband. 

Staðhæft er í breska blaðinu The Sun að í sáttmálanum sé m.a. kveðið á um það hversu miklum tíma þau eigi að eyða saman, á hvaða grundvelli þau eigi að stunda kynlíf og hvernig þau eigi að takast á við deilumál. Þá er kveðið á um að Guy beri að stuðla að tilfinningalegri og andlegri vellíðan eiginkonu sinnar og lesa sér til um Kabbalah, sem Madonna aðhyllist.  

Haft er eftir ónefndum vini hjónanna að Madonna hafi hengt sáttmálann upp á vegg á heimili þeirra og sagt er deilumál komu upp á milli þeirra: „Samningurinn Guy, samningurinn” 

Þá er staðhæft að í samningnum hafi m.a. staðið að hvorugt hjónanna mætti nota kynlíf sem vopn á hitt og að í stað þess að öskra á eiginkonu sína hafi Guy átt að horfast í augu við hana og segja. „Ég skil að framkoma mín hefur komið þér í uppnám. Viltu vera svo væn að reyna að vinna úr þessu með mér.”

• Blogga um frétt