Ásdís Rán á forsíðu tímaritsins Max. mbl.is

Eftir Jóhann Bjarna Kolbeinsson jbk@mbl.is

Ásdís Rán Gunnarsdóttir er heldur betur á milli tannanna á fólki í Búlgaríu um þessar mundir, og þá sérstaklega í höfuðborginni Sófíu. Þannig hefur hún komið fram í einum vinsælasta sjónvarpsþætti landsins, Slavi Show, tvö kvöld í röð, og þriðja heimsóknin í þáttinn bætist svo við í kvöld.

Eins og fram hefur komið er hún einnig í forsíðuviðtali í einu vinsælasta glanstímariti landsins, Max, sem kom út á miðvikudaginn, en inni í blaðinu er tíu blaðsíðna myndaþáttur tileinkaður Ásdísi.

Eins og sjá má á meðfylgjandi myndum er umfjöllunin um Ásdísi í Max afar vegleg.

Ásdís flutti nýverið til Búlgaríu ásamt eiginmanni sínum, knattspyrnukappanum Garðari Gunnlaugssyni, sem leikur með CSKA Sofia þar í landi. Að sögn Pavels Kolevs, blaðamanns sem tók viðtalið við Ásdísi fyrir Max, er hún þegar orðin mikil stjarna í Búlgaríu, og í raun mun þekktari en Garðar.