Fyrrum gítarleikari ABBA með á ABBA-sýningu

Fyrrverandi gítarleikari ABBA, Finn Sjöberg, kemur fram með hljómsveitinni Arrival á ABBA-sýningunni „The Music of ABBA“ sem haldin verður í Vodafone-höllinni laugardagskvöldið 8. nóvember.

Finn Sjöberg spilaði með ABBA á hátindi ferils hljómsveitarinnar og spilaði inn á nokkrar plötur með sveitinni á árunum 1974-1977.

Arrival hefur ferðast með ABBA-sýninguna í þrettán ár, lengur en hljómsveitin ABBA starfaði, og sýnt í yfir 20 þjóðlöndum. Sýningin nýtur gríðarlegra vinsælda og hafa ABBA-aðdáendaklúbbar víða um heim kosið hana bestu ABBA-sýningu allra tíma. Gagnrýnendur hafa gengið svo langt að segja Arrival betri en upprunalegu ABBA-hljómsveitina.

Hljómsveitina Arrival, sem er nefnd eftir samnefndri metsöluplötu ABBA, skipar einvalalið 13 hljómlistarmanna og er allur tónlistarflutningur lifandi. Mikið er lagt í búningana en Arrival er eina hljómsveitin í heiminum sem hefur leyfi til að klæðast nákvæmum eftirlíkingum af búningum ABBA. Arrival vinnur náið með höfuðpaurum ABBA, þeim Björn Ulvaeus og Benny Andersson, og er um þessar mundir að gefa út áður óútgefið ABBA-lag sem ber heitið Just a notion.

Tónleikarnir verða eins og áður sagði laugardagskvöldið 8. nóvember kl. 21. Um 150 miðar eru eftir og er miðasala í gangi á midi.is. Miðaverð er 4.900 krónur. Gestir geta valið á milli þess að sitja eða standa þegar á tónleika er komið.

Finn Sjöberg fyrrverandi gítarleikari ABBA mbl.is/Per Ejeklint