Verður Obama reyklaus forseti? JEFF HAYNES

Ljóst er að mikið mun mæða á Barack Obama þegar hann tekur við embætti forseta Bandaríkjanna í janúar og bindindissamtök hafa nú bætt gráu  ofan á svart með því að leggja fast að honum að hætta að reykja í eitt skipti fyrir öll.

Samtök, sem berjast gegn reykingum, hafa hvatt Obama til að venja sig algerlega af tóbakinu og sýna þannig landsmönnum að allt sé mögulegt í Bandaríkjunum. „Nýkjörni forsetinn er í aðstöðu til að hjálpa fólki að skilja að það er erfitt að hætta að reykja og til að hvetja 43 milljónir  reykingamanna í Bandaríkjunum til að fara að dæmi hans,“ sagði Cheryl Healton, formaður samtaka sem beita sér gegn reykingum meðal ungs fólks.

Í nýlegu sjónvarpsviðtali kom fram að Barack Obama hefur átt í erfiðleikum með að hætta að reykja. Sjónvarpsmaðurinn Tom Brokaw spurði Obama að því hvort hann væri alveg hættur að reykja og sagði hann hafa komið sér hjá því að svara þeirri spurningu í öðru viðtali. Obama svaraði að hann hefði hætt en bætti við: „Ég sagði að stundum hefði ég átt það til að falla.“

„Bíddu nú aðeins,“ sagði þá Brokaw. „Þetta þýðir að þú ert ekki hættur.“

„Það má segja það,“ svaraði Obama. „Ég myndi segja að ég hafi staðið mig vel miðað við aðstæður við að lifa miklu heilsusamlegra lífi. Og ég tel að þið eigið ekki eftir að sjá brot á þessum reglum í Hvíta húsinu,“ sagði hann og skírskotaði til þess að reykingar hafa verið bannaðar í Hvíta húsinu.

Mörgum þótti þetta loðið svar því Obama lofaði ekki að hætta að reykja utan Hvíta hússins. Og hann sagði ekkert um hvort hann kynni að reykja í laumi í Hvíta húsinu.