Veröld/Fólk | 1 Fólk - fréttir | mbl | 17.4.2009 | 12:12

Oprah býður Susan Boyle í þátt sinn

Susan Boyle syngur fyrir dómarana.

Skoska áhugasöngkonan Susan Boyle hefur heldur betur slegið í gegn eftir að hún kom fram í sjónvarpsþættinum Bretar hafa hæfileika um páskana. 19 milljónir manna hafa nú horft á myndskeið með söng Boyle og bandaríska sjónvarpskonan Oprah Winfrey hefur boðið henni í þátt sinn.

Susan Boyle, sem býr með kettinum Pebbles í raðhúsi í Skotlandi, kom Simon Cowell og öðrum dómurum í sjónvarpsþættinum í opna skjöldu þegar hún hóf upp raust sína og reyndist hafa söngrödd á heimsmælikvarða.

Boyle, sem er 47 ára, hefur hins vegar útlitið ekki með sér og sagði raunar í þættinum, að hún hefði aldrei verið kysst. Áhorfendur og dómarar hlógu líka, þegar hún sagðist vilja verða önnur Elaine Page, en sá hlátur þagnaði fljótt.

Vinir og nágrannar Boyle í Blackburn, skammt frá Edinborg, segja að alltaf hafi verið ljóst að hún myndi á endanum slá í gegn. Boyle hefur verið fastur karaoke-söngvari á Happy Vakkey hótelinu lengi.

Boyle segist hins vegar sjálf ekki vita hvaðan á hana stendur veðrið. „Ég gerði aldrei ráð fyrir þessari vitleysu. Ég steig bara upp á sviðið og lét þá rakka mig niður," sagði hún við AP fréttastofuna.

Susan Boyle í Bretar hafa hæfileika