Bjarnfreðarson stefnir á fleiri Íslandsmet
Setja bókamerki
Þriðji sýningardagur kvikmyndarinnar Bjarnfreðarson er í dag og eftir kvöldið kemur í ljós hvort hún slær nýtt Íslandsmet með því eiga aðsóknarmestu opnunarhelgi sögunnar. Sú kvikmynd sem á metið er Harry Potter and the Chamber of Secrets, sem skilaði 17 milljónum í kassann um fyrstu sýningarhelgina á Íslandi.
Allt útlit er fyrir að þeir félagar Georg, Daníel og Ólafur Ragnar nái að trekkja að nógu marga bíógesti til að slá það met í kvöld, enda stefnir í að uppselt verði á langflestar eða allar sýningar kvöldsins og það þrátt fyrir að mánudagar séu almennt síðri sýningardagar. Sambíómenn telja í þetta skiptið mánudaginn með til helgarinnar þar sem lokað var í bíóhúsum á föstudag, en hefðbundnar sýningarhelgar eru almennt taldar þriggja daga frá föstudegi til sunnudags. Sé aðeins helgin tekin með tveimur sýningardögum, laugardegi og sunnudegi, var aðsóknin 11.004 manns og tekjurnar tæpar 13 milljónir króna.
Bjarnfreðarson hefur gengið fyrir fullu húsi frá því hún var tekin í almennar sýningar á annan í jólum og braut hún raunar Íslandsmet strax á fyrsta degi því þá var hún sýnd í 17 sölum víðsvegar um land. Síðan hefur verið uppselt á heilar 29 sýningar allt frá Reykjavík til Patreksfjarðar, þar sem nokkrir bíógesta þurftu reyndar að sitja í tröppunum. Meðal bíógesta á Patreksfirði var auk þess einn aðalleikari myndarinnar, Jörundur Ragnarsson sem leikur Daníel, en hann mætti í bíó ásamt bæjarstjóra Vesturbyggðar og föður sínum Ragnari Jörundssyni.
Talsmenn Sambíóana gera ráð fyrir því að eftir fyrstu þrjá sýningardagana hafi rúmlega 17.500 bíógestir hlegið með og að þremenningunum seinheppnu sem hafa verið með ólíkindum vinsælir síðan Næturvaktin leit fyrst dagsins ljós. Eftir kvöldið í kvöld kemur svo í ljós hvort Bjarnfreðarson haldi áfram að skrifa nafn sitt í sögubækurnar.
Hannes Pálsson hjá SagaFilm segir þetta ekki síst vel af sér vikið sé það haft í huga að á sama tíma er verið að frumsýna eina stærstu mynd kvikmyndasögunnar, Hollywood þrívíddarmyndina Avatar. „Þetta sýnir hvar eftirspurnin er mikil eftir íslenskum bíómyndum og þessari eftirspurn verður að svara, en á sama tíma er verið að skera niður framlag til íslenskrar kvikmyndagerðar.“
Of margir nemendur og ákall um hæft starfsfólk
Finnar og Svíar taka ekki á móti særðum frá Gasa
Mikill útflutningur frá Vestfjörðum
Vangaveltur gengu lengra en innistæða var fyrir
Búið að fella björninn
Grænlendingar vildu ekki fá björninn til baka