Susan Boyle í heimsmetabókina

Skoska söngkonan Susan Boyle hefur sett þrjú met sem skráð verða í heimsmetabók Guinness. Aldrei áður hefur kona gefið út disk í Bretlandi sem hefur selst eins hratt og diskurinn, I Dreamed A Dream.

Diskurinn er einnig sá diskur sem hefur selst í flestum eintökum fyrstu vikuna sem hann er í sölu. Boyle einnig elsta manneskjan sem hefur komist á toppinn, en hún er 48 ára gömul. Fyrra met átti Jane McDonald sem var 35 ára þegar hún komst á toppinn árið 1998.

Boyle skaust upp á stjörnuhiminn þegar hún kom fram í hæfileikakeppni í ITV-sjónvarpsstöðinni.  Hún segir að það sé sér sérstakur heiður að vera skráð í heimsmetabókina. Hún segir að þegar hún var lítil stúlka hafi hún lesið bókina og þá hafi hún ekki látið sig dreyma um að nafn hennar yrði þar einhvern tíman að finna.

I Dreamed A Dream seldist í 411,820 eintökum fyrstu vikuna eftir að hann kom út. Það er um 50 þúsund fleiri eintök en fyrri methafi státaði af sem var Arctic Monkeys.