Bandaríska rokktvíeykið í The White Stripes hefur slökkt á magnaranum og stungið gítarnöglinni í vasann. Jack og Meg White hafa sent frá sér yfirlýsingu þar sem fram kemur að hljómsveitin sé hætt að gefa út plötur og koma fram á tónleikum.
Þau þakka aðdáendum sínum fyrir stuðninginn í tilkynningu sem er birt á vefsíðu Detroit-sveitarinnar.
Jack og Meg segja að ýmsar ástæður séu fyrir því að hljómsveitin sé nú hætt. Aðal ástæðan sé hins vegar sú að þau vilji „varðveita það sem er fallegt og sérstakt við hljómsveitina.“
The White Stripes var stofnuð fyrir 13 árum og hefur gefið út sex hljóðversplötur. Sú síðasta í röðinni, Icky Thump, kom út árið 2007. Hljómsveitin sótti Ísland heim árið 2005 og lék fyrir troðfullri Laugardalshöll.