Kerti og myndir af Knúti hafa verið lögð við bjarndýragerðið í dýragarðinum í Berlín.

Ísbjörninn Knútur, sem drapst skyndilega í dýragarðinum í Berlín um helgina, var með heilaskemmdir sem drógu hann væntanlega til dauða.

Í yfirlýsingu frá dýragarðinum segir, að bráðabirgðakrufning hafi leitt í ljós umtalsverða heilaskaða sem sennilega hafi valdið skyndilegum dauða dýrsins. Ekki sé að sjá að önnur líffæri hafi brugðist. 

Knútur fannst dauður í ísbjarnalauginni í dýragarðinum á laugardag. Hann hlaut heimsfrægð í byrjun ársins 2007 þegar fréttir bárust af því, að móðir hans hunsaði hann og að starfsmenn dýragarðsins hefðu tekið hann undir sinn verndarvæng og gæfu honum mjólk úr pela.

Húnninn vakti mikla athygli þegar hann var sýndur fyrst og fréttamenn víðsvegar að úr heiminum komu til Berlínar til að taka myndir af Knúti og fjalla um hann. Þá jókst aðsókn að dýragarðinum um allan helming.

En þegar Knútur óx úr grasi þótti hann sýna af sér óeðlilega hegðun og atferlisfræðingar veltu því fyrir sér hvort athyglin hefði stigið honum til höfuðs. Hann hljóp fram og aftur og ógnaði meðal annars fólki, sem vildi taka af honum myndir.   

Margir urðu harmi slegnir við fréttir af dauða Knúts og hafa blómvendir, myndir og kveðjur verið lagðar að ísbjarnagerðinu í dýragarðinum. Þá hafa yfir 4 þúsund manns skrifað nafn í minningabók sem opnuð var á netinu.  Einnig er hafin fjársöfnun fyrir minnismerki um björninn.