Heimsfrumsýning á Eldfjallinu, bíómynd Rúnars Rúnarssonar, var haldin á kvikmyndahátíðinni í Cannes í dag klukkan 14 á staðartíma.
Er bíómynd Rúnars fyrsta íslenska myndin sem kemst í keppni á Cannes hátíðinni í áratugi en úrslit keppninnar verða kunngerð í lok næstu viku.
Salurinn var troðfullur og sömuleiðis var hvert sæti setið á fréttamannafundinum, sem haldinn var eftir sýningu myndarinnar.
Flestar spurningar blaðamanna vörðuðu tilfinningalíf aðalpersónu myndarinnar. Theódór Júlíusson leikur aðalpersónu myndarinnar sem sýnir ekki mikið af þeim tilfinningum sem hann ber í brjósti. Persóna Theódórs heitir Hannes og er ljúka farsælu starfi sem húsvörður og þarf að takast á við að lifa á eftirlaunum sínum.
Á blaðamannafundinum sagði Rúnar, að þetta væri saga kynslóðar sem hefði verið á undan honum á Íslandi og hugsanlega víða í Norður-Evrópu.
Blaðamaður frá Suður-Evrópu lýsti þeirri skoðun, að svipaðar týpur væru einnig algengar sunnamegin í Evrópu.
Þegar aðalleikararnir voru spurðir á blaðamannafundinum hvernig þeim hefði fundist myndin var svar þeirra einfalt: Við höfum ekki enn fengið að sjá hana.