Norræna spunasönghljómsveitin IKI hlaut í dag dönsku tónlistarverðlaunin fyrir sína fyrstu plötu í flokki djassraddtónlistar. Söngkonurnar níu, sem koma frá Íslandi, Danmörku, Finnlandi og Noregi, gáfu út sína fyrstu plötu í sumar.
Anna María Björnsdóttir er eina íslenska söngkonan í IKI. Öll tónlist sveitarinnar er spunnin á staðnum og líta söngkonurnar á þetta sem heimspeki sem byggir á að vera í núinu, skapa tónlist og kanna mannsröddina, mismunandi hliðar á henni og hljóð. Plata IKI var spunnin á þremur dögum í upptökuveri. Teknir voru upp sjö tímar af tónlist en valin voru tólf uppáhalds lög til að hafa á plötunni.
Nýstárleg tónlistarleg nálgun IKI hefur nú þegar komið þeim á fjölda tónlistarhátíða, í sjónvarps- og útvarpsþætti á Íslandi, Danmörku og Noregi auk þess sem þær hafa haldið fjöldann allan af tónleikum.