Breskir tónlistarunnendur ætla að koma fyrir bronsstyttu í fullri stærð af söngkonunni Amy Winehouse skammt frá húsi hennar í Camden í London. Söngkonan lést langt fyrir aldur fram á heimili sínu í júlí í fyrra eftir ofneyslu vímuefna en hús hennar var sett á sölu í maí.
Roundhouse-samkomustaðurinn í norðurhluta Camden er vettvangur tónlistarviðburða af ýmsu tagi og var Winehouse í hópi þeirra sem tróðu þar upp reglulega. Forráðamenn Roundhosue vilja minnast söngkonunnar og ráðgera að láta útbúa bronsstyttu af henni og koma henni fyrir skammt frá heimili hennar.
„Okkur finnst afar mikilvægt að heiðra minningu Amy í Camden og framlag hennar til tónlistarinnar,“ segir talsmaður Roundhouse í viðtali við dagblaðið Camden New Journal. „Styttan verður úr bronsi og í fullri stærð og henni verður fundinn staður á veröndinni fyrir utan samkomustaðinn.“