Þjónustukona á veitingastað í Knoxville í Bandaríkjunum datt í lukkupottinn á dögunum þegar rausnarlegur viðskiptavinur skildi eftir 1.075 dala þjórfé, eða að andvirði tæplega 150 þúsund íslenskra króna. Reikningurinn sjálfur hljóðaði hins vegar aðeins upp á 29 dali.
Þetta kemur fram í frétt Huffington Post.
Konan, Khadijah Muhammad, var ný snúin aftur til vinnu eftir að hafa heimsótt veika móður sína á spítala í Ohio. Vegna ferðarinnar hafði hún misst mikið úr vinnu og hafði miklar áhyggjur af komandi reikningum, hafði hún meðal annars sagt að hún þyrfti á kraftaverki að halda til þess að eiga fyrir greiðslu þeirra. Fjölskylduna sem skildi þjórféð eftir segir hún hafa verið kraftaverkið sem hún bað fyrir.