Lögregla í Washingtonríki telur að hún hafi fundið lík leikkonunnar Misty Upham en hennar hefur verið saknað í tíu daga.
Upham, sem meðal annars er þekkt fyrir leik í August: Osage County og Django Unchained, er 32 ára en fjölskylda hennar segir að hún hafi verið í sjálfsvígshugleiðingum er hún hvarf. Líkið fannst í gljúfri við White River í gærkvöldi. Ekki liggur fyrir niðurstaða réttarmeinafræðings um hvort líkið sé af Upham en samkvæmt bandarískum fjölmiðlum virðist lítill vafi vera á því. Taska með skilríkjum hennar fannst á sama stað.
Faðir hennar, Charles Upham, sagði í viðtali við útvarpsstöð í ríkinu að dóttir hans hefði verið í miklu ójafnvægi og ekki tekið lyfin sín í einhvern tíma. Hún er með geðhvörf (tvískautaröskun - bipolar disorder) og kvíðaröskun.
Fjölskylda Upham segir að hún hafi flutt til Seattle til þess að aðstoða föður sinn sem hafði fengið heilablóðfall. Síðast sást til hennar er hún yfirgaf íbúð systur sinnar í Muckleshoot í Washingtonríki hinn 5. október.