Elsti nemandi sem útskrifast hefur úr íþróttafræðinámi hér á landi mun taka við brautskráningarskírteininu á Laugarvatni í febrúar næstkomandi.
Það er Kópavogsbúinn Helga Guðrún Gunnarsdóttir sem fagnar þá einnig sextugsafmæli sínu og hyggst vinna að bættu líkamsástandi jafnaldra sinna.
Helga Guðrún starfaði í 17 ár á Morgunblaðinu, m.a. sem blaðamaður, en var sagt upp störfum haustið 2004. Í kjölfarið sótti hún um fjölda starfa, en litið var framhjá fjölbreyttri starfsreynslu og góðum meðmælum og þess í stað einblínt á aldur hennar. „Ég var rétt að skríða í fimmtugt og það þýddi að ég var með gjaldfallna kennitölu,“ segir hún í ítarlegu viðtali í Morgunblaðinu í dag.