Þróa þáttaröð um Sturlunga

Kvikmyndafyrirtækið Truenorth vinnur nú að þróun kvikmynda eða þáttaraðar um Sturlunga. Vefsíðan Screen Daily greinir frá þessu í dag en fulltrúar frá fyrirtækinu eru nú staddir á American Film Market þar sem hugmyndin var kynnt. 

Er talað um að kvikmyndin verði í Godfather-stíl en fjallað um ævi manna af Sturlungaætt. „Sturlungahugmyndin hefur vakið mikla athygli og er nú inni á borði hjá stórum kvikmyndaframleiðanda. Stór framleiðandi í Bandaríkjunum gæti tekið þátt í verkefninu,“ segir Leifur B. Dagfinnsson, einn stofnenda Truenorth, í samtali við Screen Daily. 

Þá er einnig nefnd sú hugmynd að aðrir skandinavískir framleiðendur geti tekið þátt í verkefninu. Tökur gætu hafist árið 2016. 

Friðrik Þór Friðriksson er einn þátttakenda í verkefninu eftir því sem greint er á vefsíðunni. 

Á AFM-hátíðinni var fyrsta leikna kvikmynd Ara Alexanders kynnt til sögunnar, en hann vinnur að gerð kvikmyndar um líkfundarmálið, sem skók íslenskt samfélag fyrir um 10 árum. Hefur myndin fengið titilinn Vaidas, í höfuðið á litháska manninum sem fannst látinn. Munu tökur á þeirri mynd hefjast í febrúar árið 2016.

• 2 blogg um fréttina

Bloggað um fréttina

• Magnús Sigurðsson: Var Snorri Sturluson frímúrari?
• Páll Vilhjálmsson: Sturlungaöld í umræðunni og bíóið