Gamanleikarinn Adam Sandler er efstur á lista tímaritsins Forbes yfir oflaunuðustu leikarana í Hollywood, annað árið í röð. Þar hafði hann betur, eða verr eftir atvikum, en starfsbræður hans eins og Johnny Depp og Tom Hanks.
Samkvæmt gögnunum sem tímaritið byggði á skilar Sandler kvikmyndaverum að meðaltali 3,20 dollurum fyrir hvern dollara sem hann fær borgaðan. Það er lægsta hlutfall nokkurs leikara sem tímaritið skoðaði. Sandler lék síðast í myndinni „Grown Ups 2“ sem halaði inn 246 milljónum dollara á heimsvísu. Það var þó ekki nóg til að bæta upp fyrir aðrar myndir hans sem fóru flatt eins og „Jack and Jill“ og „That's My Boy“.
Johnny Depp var í öðru sæti á lista Forbes vegna nýlegra brotlendinga hans með myndunum „Lone Ranger“ og „Dark Shadows“. Listinn er reiknaður út frá áætluðum launum leikaranna að teknu tilliti til kostnaðar og hagnaðar þriggja síðustu kvikmynda þeirra.
Ben Stiller, Ryan Reynolds og Tom Hanks voru svo í þriðja til fimma sæti listans sem er líklega ekki sérlega eftirsóttur innan leikarastéttarinnar vestra.