Íslenski leikarinn Sverrir Guðnason hlaut verðlaun fyrir bestan leik í aðalhlutverki þegar sænsku kvikmyndaverðlaunin Gullbjallan voru afhent við hátíðlega athöfn í Stokkhólmi í kvöld. Þetta er annað árið í röð sem Sverrir hlýtur verðlaun á Gullbjöllunni fyrir kvikmyndaleik.
Sverrir var annars vegar tilnefndur - og vann til verðlauna - fyrir leik sinn í kvikmyndinni Flugparken, þar sem hann er í aðalhlutverki, en einnig var hann tilnefndur sem aukaleikari fyrir leik í myndinni Gentlemen. Í fyrra hlaut Sverrir verðlaunin fyrir leik í kvikmyndinni Moniku Z.
Sverrir flutti ungur að árum til Svíþjóðar en hafði þá þegar stigið fyrstu skrefin í leiklistinni hér á Íslandi. Hans fyrsta hlutverk í Svíþjóð var í unglingaþáttunum Sexton árið 1996 en síðan þá hefur hann leikið í ýmsum sjónvarpsþáttum og kvikmyndum.