Seðlarnir fljúga í MR

 „Gleði til góðgerða“ er yfirskrift góðgerðarvikunnar sem nú stendur yfir í Menntaskólanum í Reykjavík. Góðgerðarvikan er einn af stærri viðburðum skólaárs MR-inga og er að þessu sinni safnað fyrir sumarbúðir þroska- og hreyfihamlaðra barna í Reykjadal.

„Með söfnuninni vilja nemendur vekja athygli á því hve frábær og skemmtilegur staður Reykjadalur er fyrir krakka á öllum aldri og að það væri mjög sorglegt ef þetta einstaka starf mundi leggjast niður sökum fjárskorts,“ segir í tilkynningu frá Góðgerðarfélagi MR.

Menntskælingarnir hafa gert ýmislegt til að sýna málefninu stuðning. Nokkrir piltar stóðu fyrir rjómakasti þar sem fólk gat borgað fyrir að fá að kasta rjóma í þá. Rektor og kennarar buðu upp á selfie-bás þar sem nemendur gátu keypt mynd af sér með þeim og vakti uppátækið mikla lukku. Einnig hafa margir nemendur safnað áheitum fyrir málstaðinn og má þar nefna nemanda sem hyggst hjóla frá Selfossi til Reykjavíkur, annan sem ætlar að fá sér húðflúr af merki skólans og þann þriðja sem ætlar að lita hárið sitt blátt.

Hér að ofan má sjá hvatningarmyndband söfnunarinnar og hér að neðan má sjá tónlistarmyndband við lagið „Hver króna telur“ sem var samið sérstaklega fyrir átakið.

• Blogga um frétt