Sam Smith kom sá og sigraði

Breski sálarsöngvarinn Sam Smith átti sviðið á Grammy verðlaunahátíðinni vestanhafs í gærkvöldi en fyrir ári síðan vissu fáir hver söngvarinn var. Alls fékk Smith fern verðlaun á hátíðinni. Það var hins vegar Beck sem fór heim með verðlaunin fyrir albúm ársins.

Bandaríska söngkonan Beyonce og Pharrell Williams, sem gerði lagið Happy að almenningseign á árinu, fengu þrenn verðlaun hvor á uppskeruhátíð tónlistarfólks í Los Angeles í gærkvöldi.

Smith var  meðal annars valinn besti nýliðinn og eins átti hann lag ársins. Smith, sem starfaði sem barþjónn í Lundúnum þar til fyrir skömmu, þakkaði manninum sem hann varð ástfanginn af í fyrra því hann veitti Smith innblástur við að semja lagið „Stay With Me“.

• Blogga um frétt