Fékk flogakast í fallhlífarstökki

Betur fór en á horfðist þegar hinn 22 ára Christopher Jones fékk flogakast í fallhlífarstökki hinn 14. nóvember síðastliðinn. Jones var í frjálsu falli þegar hann fékk flog og missti meðvitund en sem betur fer gat fallhlífarstökksleiðbeinandinn, Sheldon McFarlane, sem hoppaði með honum, opnað fallhlífina fyrir hann.

Leiðbeinandinn var með myndavél á sér sem tók upp stökkið og því náðist hetjudáðin á myndband sem birt var á YouTube í gær og hafa þegar meira en fjórar milljónir manns horft á það.

Í myndbandinu sést þegar Jones veltist skyndilega yfir á bakið og hristist stjórnlaust. Leiðbeinandinn reynir að komast nógu nálægt honum til að opna fallhlífina en gengur erfiðlega og mistekst í fyrstu tilraun. Þegar þeir eru komnir í um 4.000 feta hæð yfir jörðu nær hann að toga í spottann og fallhlífin opnast. Jones rankaði við sér í um 3.000 fetum og gat lent með öruggum hætti.

• Blogga um frétt