Ný stikla fyrir myndina Blóðberg

Vesturport sendi í dag frá sér stiklu til að kynna nýjustu mynd teymisins, Blóðberg. Myndin er í leikstjórn Björns Hlyns Haraldssonar sem einnig skrifar handritið.

Að því er segir í tilkynningu fjallar myndin um hina hefðbundnu íslensku fjölskyldu sem á yfirborðinu er nánast fullkomin. Fjölskyldufaðirinn bjargar samlöndum sínum með skrifum á sjálfshjálparbókum á meðan móðirin bjargar fólki á spítalanum þar sem hún vinnur sem hjúkrunarkona. En hvorugt þeirra hefur kjark til að bjarga sjálfu sér. Þau lifa og hrærast í lífi leyndarmála sem einn daginn banka upp á.. og þá breytist allt.

Blóðberg er persónuleg saga fjölskyldu þar sem fylgst er með meðlimum hennar í gegnum strembið ferðalag sem er hlaðið ást, sorg og gleði. Áhorfandinn tekur þátt í ferðalaginu og upplifir þrautir og sigra fjölskyldunnar og situr á endanum eftir með aðra sýn á manneskjurnar en haldið var af stað með í upphafi. Þessi saga hreyfir við áhorfandanum og er góður samfélagslegur spegill á nútímann, að sögn aðstandenda myndarinnar. Bæta þeir við að á Íslandi sé jafnan talað um að tæp 10 prósent barna séu rangfeðruð. Þau vandamál sem myndin fáist við séu því furðu algeng.

Rakel Garðarsdóttir og Ágústa M. Ólafsdóttir framleiða myndina en hún er unnin í samvinnu við 365 & Pegasus. Meðal leikara eru þau: Hilmar Jónsson, Harpa Arnardóttir, Hilmar Jensson, Þórunn Arna Kristjánsdóttir, María Heba Þorkelsdóttir og Sveinn Ólafur Gunnarsson. Þetta er fyrsta kvikmynd Björns Hlyns sem leikstjóri en hann hefur leikið í ótal myndum og sjónvarpsþáttum hér á landi sem og erlendis.

Myndin verður frumsýnd í Sambíóunum þann 10. apríl.

• Blogga um frétt