Kempur og áhugafólk á þrekmótaröð

Það var allt á fullu í Digranesi í dag, en þar var í gangi annað mót ársins í þrekmótaröðinni. Keppendur komu allsstaðar að, en Linda Svanbergsdóttir, einn skipuleggjandi mótsins, segir að fólk sé í mismunandi ásigkomulagi og formi, en allir hafi það sameiginlegt að njóta þess að stunda líkamsrækt. Þannig hafi nokkrar gamlar kempur úr keppnisíþróttum og áhugafólk sem datt niður á líkamsræktina nýlegaverið meðal þátttakenda.

Linda segir flesta vera með ákveðna markmiðasetningu yfir árið og að mótin þrjú sem haldin eru yfir árið séu ákveðin uppskeruhátíð. Síðasta mót ársins verður haldið í lok næsta mánaðar, en það er útimót. Í framhaldinu af því verður lokahóf þar sem hraustasta fólk landsins verður krýnt.

Þegar mbl.is náði tali af Lindu var fyrrverandi fótboltajaxlinn Dean Martin að fara í gegnum brautina, en Linda segir að margt keppnisíþróttafólk hafi fundið sig á þrekmótum eftir að hafa lagt aðrar keppnisíþróttir á hilluna.

Meðal þrauta sem fólk þarf að leysa eru sprettir, bekkpressa, froskahopp, ketilbjölluæfingar, upphífingar og mismunandi stangaæfingar. Til að auka örlítið á erfiðleikastigið eru þær allar gerðar á 20 mínútna tímabili sem inniheldur aðeins fjórar mínútur í hvíld. Þar að auki er fjöldi setta stigvaxandi í hverri æfingu.

• Blogga um frétt