Nýdönsk gefur út nýtt lag

Hljómsveitin Nýdönsk hefur nú sent frá sér lagið Heimsins stærsta tár. Lagið og textinn er eftir Björn Jörund Friðbjörnsson og var það flutt í Hljómskálanum af Birni og hljómsveit hússins árið 2011. Í tilkynningu frá sveitinni kemur fram að lagið komi nú út í fyrsta sinn í flutningi félaga Björns úr Nýdönsk sem þótti lagið of gott til að gera það ekki að sínu.

Það hefur verið líflegt í kringum Nýdönsk undanfarin ár og er skemmst að minnast Nýdanskra daga sem voru haldnir í ýmsum bæjarfélögum fyrr á árinu. Samkvæmt tilkynningu er niðurstaðna úr nýrri Gallup könnun sem Capacent hefur framkvæmt um vitund íslensku þjóðarinnar um Nýdönsk er væntanleg á næstu dögum.

Miðasala á árlega hausttónleika Nýdönsk hefst 7. maí næstkomandi en hljómsveitin heldur áfram uppteknum hætti og blæs til tónleika í tónleikahúsunum Hörpu og Hofi í september á þessu ári, auk þess að stíga á svið í nýrri og endurbættri Valaskjálf, Egilsstöðum.

Heyra má lagið hér að neðan. 

• Blogga um frétt