Íþróttahetjan og sjónvarpsstjarnan Bruce Jenner hefur verið kærður fyrir sinn þátt í dauðsfalli konu, sem lést eftir að Jenner ók aftan á bifreið hennar með þeim afleiðingum að hún rann í veg fyrir þriðja bílinn.
Stjúpbörn Kim Howe, sem var 69 ára gömul þegar hún lést, fara fram á að Jenner greiði þeim ótilgreinda upphæð fyrir að hafa valdið dauða Howe með gáleysi sínu, að því er fram kemur hjá LA Times.
Jenner slapp ómeiddur, en hann var undir stýri á stórum jeppa þegar hann ók aftan á fólksbíl Howe. Samkvæmt slúðurmiðlinum TMZ er málið enn í rannsókn, en heimildir miðilsins herma að ólíklegt verði að teljast að ákæra verði gefin út á hendur Jenner.
Jenner varð heimsfrægur þegar hann vann til gullverðlauna á Ólympíuleikunum í Montreal 1976 og skaust svo aftur upp á stjörnuhimininn í þáttunum Keeping Up With The Kardashians.
Jenner sagði nýlega frá því í sjónvarpsviðtali að hann væri kona og í kynleiðréttingarferli. Hann hefur hins vegar sagt að eins og sakir standa vilji hann vera kallaður „hann“ frekar en „hún“.