56 skot eru banvæn blanda

Réttarhöld hefjast yfir kráareiganda í Frakklandi í dag en hann er ákærður fyrir manndráp eftir að fastagestur á krá hans lést eftir að hafa drukkið 56 „áfengisskot“ og þar með sett nýtt drykkjumet á kránni.

Það var í október í fyrra sem viðskiptavinur, Renaud 57 ára, drakk alls 56 áfengisskot á einu kvöldi á kránni sem nefnist Le Starter og er í Clermont-Ferrand. Dóttir Renauds og vinir fylgdust með drykkjunni en á töflu við barinn stóð að metið væri 55 áfengisskot, met sem Renaud ætlaði sér að slá. 

Á einungis einni mínútu drakk hann 30 skot. Sem þýðir að hann drakk meira en einn lítra af sterku áfengi á einni mínútu. Áður hafði hann hellt í í sig 14 áfengisskotum áður en hann ákvað að reyna að slá metið.

Dóttir Renauds og vinir hans þurftu að bera hann heim en við komuna þangað fór hann í hjartastopp og lést daginn eftir á sjúkrahúsi.

Er nú tekist á um það hvort kráareigandinn hafi gerst sekur um stórkostlegt gáleysi og beri ábyrgð á dauða mannsins, segir í frétt The Local.

Að sögn dóttur hans hvíslaði kráareigandinn aðeins tólf í viðbót þegar Renault stóð og hellti í sig áfenginu. Það þykir benda til þess að hann hafi hvatt viðskiptavin sinn áfram við ofdrykkjuna.

Lögmaður dóttur mannsins, Antoine Portal, segir að ekki sé hægt að segja með fullri vissu hvort Renault væri enn á lífi ef hann hefði ekki drukkið tólf síðustu skotin en með því að drekka þau hafi verið fullvíst að hann átti ekki möguleika. 

Lögfræðingur kráareigandans er hins vegar ósammála þessu og segir að kráareigandinn hafi reynt að stöðva manninn við að reyna að slá metið. Hann segir að maðurinn hafi sjálfur borið ábyrgð á drykkju sinna sem og dóttir hans og vinir.

• Blogga um frétt