Vill 100 milljónir fyrir kaffisull

Lögregluþjónn í Norður-Karólínuríki Bandaríkjanna fer fram á 750 þúsund Bandaríkjadali (tæplega 100 milljónir króna) í bætur frá Starbucks-kaffihúsakeðjunni eftir að hann hellti yfir sig bolla af ókeypis kaffi árið 2012.

Lögregluþjónninn Matthew Kohr brenndist illa við atvikið og sagðist fyrir rétti í síðustu viku ekki hafa haft hugmynd um að kaffið „væri svona svakalega heitt“. Þá segir hann atvikið hafa ýtt undir svæðisgarnabólgu (Chrohn's disease) sem hann þjáist af, en það hafi haft í för með sér mikinn sársauka og skurðaðgerðir. Kohr vildi upphaflega fara fram á tíu milljónir Bandaríkjadala og sagði það vera „sanngjarnan verðmiða á tvö töpuð ár lífs síns“. 750 þúsund dalir eru hins vegar hámarksupphæðin sem hann getur sótt að lögum samkvæmt frétt Huffington Post.

Starbucks í Bandaríkjunum gefur lögregluþjónum í búning frítt kaffi. Lögmaður fyrirtækisins segir veikindi Kohrs langvinn og alvarleg, en telur þau í raun og veru hafa lítið með frítt kaffi að gera.

• Blogga um frétt