Veröld/Fólk | mbl | 24.5.2015 | 11:48 | Uppfært 12:08

Atli Fannar með vinsælasta tístið

Fimm vinsælustu tístin yfir alla vikuna.

Alls birtust 20.565 tíst merkt #12stig í gær, þegar lokakeppni Eurovisionsöngvakeppninnar fór fram, sem er talsverð aukning frá því í fyrra, þegar ríflega 16.000 tíst voru birt meðan á úrslitakvöldinu stóð, að því er segir í frétt frá Vodafone.

Þar með hélt #12stig-tístum áfram að fjölga, en alls birtust 40.151 tíst dagana sem undankeppnirnar tvær og lokakeppnin fóru fram í þessari viku. Í fyrra var heildarfjöldinn 25.636, þannig að aukningin er rétt um 57% milli ára.

Vinsælustu tístin á úrslitakvöldinu, þ.e. þau sem var oftast retweet-að, áttu borgarstjórnmálamennirnir Gísli Marteinn Baldursson og Dagur B. Eggertsson, en sá síðarnefndi átti bæði tístin í 2. og 3. sæti.

Next up: Lagið Milljón raddir, fyrir hönd þjóðarinnar sem myrðir blaða- og stjórnmálamenn ef raddir þeirra eru óþægilegar. #12stig
— Gísli Marteinn (@gislimarteinn) May 23, 2015

En þegar öll Eurovision-vikan er skoðuð átti Atli Fannar Bjarkason, ritstjóri Nútímans, vinsælasta tístið:

María fór út fyrir Íslands hönd og var til sóma. Ásmundur Einar fór út fyrir Íslands hönd og ældi yfir fólk. Verum pirruð út í hann. #12stig
— Atli Fannar (@atlifannar) May 21, 2015

Í frétt Vodafone segir að mjög athyglisvert sé að sjá að Atli Fannar átti hvorki vinsælasta tístið í undankeppnunum né lokakeppninni – en tístið hans frá því á fimmtudagskvöldið hélt dampi lengur en önnur og náði þannig forskoti sem aðrir hafa ekki náð að vinna upp. Hafa ber í huga að þessar tölur miðast við miðnætti á laugardagskvöld, þannig að eitthvað gæti mögulega breyst næstu daga.

Frétt mbl.is: Tíst Ara Eldjárns það vinsælasta