Á vefsíðu Eurovision hafa nú verið birtar heildarniðurstöður kosninganna í öllum löndum auk niðurstöður dómnefndanna. Athygli vekur að íslenskir kjósendur vildu gefa Ítalíu 12 stig en dómnefndin setti þá í 11. sæti.
Að mati dómnefndarinnar voru Svíar með besta lagið, Norðmenn í öðru sæti og Lettar í því þriðja. Að mati kjósenda var hins vegar Ítalía með besta lagið, Svíar í öðru sæti og Ástralir í því þriðja. Lettarnir voru ekki jafnvinsælir hjá kjósendum og þeir voru hjá dómnefndinni og vildi þjóðin setja þá í áttunda sæti.
Rússar sem höfnuðu í öðru sæti í Eurovision komust ekki á meðal þeirra efstu, hvorki hjá þjóðinni né dómnefndinni. Vildi dómnefndin setja þá í sjöunda sætið og þjóðin í það níunda. Gaf Ísland þeim að lokum 3 stig.
Samkvæmt kjósendum voru Grikkir með lélegasta lagið og hefðu átt að enda í 27. sæti. Að mati dómnefndarinnar var það hins vegar Albanía sem átti að verma botnsætið. Armenar voru aftur á móti bæði í 26. sæti hjá kjósendum og dómnefndinni og enduðu þeir því á botninum.
Íslensku dómnefndina skipuðu þau Einar Bárðason, Heiðar Örn Kristjánsson, Unnur Sara Eldjárn, Védís Hervör Árnadóttir og Birgitta Haukdal.