Leikarinn Johnny Depp á yfir höfði sér allt að tíu ára fangelsi í Ástralíu fyrir að hafa farið með tvo hunda inn í landið með ólöglegum hætti. Þá gæti hann þurft að greiða háa sekt sem jafngildir rúmum 35 milljónum íslenskra króna.
Brot leikarans er litið mjög alvarlegum augum. Depp og eiginkona hans, Amber Heard, eru sökuð um að hafa brotið reglur um innflutning dýra er þau létu ekki tollverði vita af komu tveggja hunda sinna, Boo og Pistol, til landsins. Hundarnir eru af Yorkshire Terrier-kyni. Hjónin komu á einkaþotu til Ástralíu fyrir rúmum mánuði síðan.
Í Ástralíu eru mjög ströng lög um sóttkví dýra sem þangað koma. Þetta er gert til að draga úr líkum á sjúkdómum og sýkingum, segir í frétt BBC um málið. Landbúnaðarráðherrann Barnaby Joyce segir að lögin gildi um alla. Hann segir að Boo og Pistol hafi verið „laumað“ til Ástralíu. Upp hafi komist um athæfi hjónanna er þau fóru með hundana til hundasnyrtis.
Hundar sem koma til Ástralíu verða að hefja dvöl sína þar á að minnsta kosti 10 daga sóttkví.
Frétt mbl.is: Hundarnir sendir heim í einkaþotu
Frétt mbl.is: Depp laumaði hundum til Ástralíu