Leikritið Býr Íslendingur hér verður frumsýnt í september í Samkomuhúsinu á Akureyri. Verkið er byggt á bók Garðars Sverrissonar um líf Leifs Muller sem tekinn var til fanga af nasistum í seinni heimsstyrjöldinni. Þórarinn Eyfjörð gerir leikgerðina en Arnar Jónsson og Benedikt Gröndal fara með burðarhlutverk í sýningunni. Jón Páll Eyjólfsson leikstýrir. Davíð Þór Jónsson sér um tónlistina og Íris Eggertsdóttir um búningana.
Leifur ólst upp í Reykjavík en fór sem ungur maður til Noregs í nám. Hann er síðan staddur í Noregi þegar nasistar hernema landið. Hann gerir áætlun um að komast heim til Íslands en er svikinn í hendur Gestapó af öðrum Íslendingi, færður í einangrun og þaðan sendur til Grini fangabúðanna í nágrenni Oslóar. Þaðan flytja Þjóðverjar hann til Sachsenhausen sem eru alræmdar vinnu- og útrýmingarbúðir Nasista. Frásögn Leifs er einstök í bókinni, hugrökk og hispurslaus og vakti mikla athygli þegar hún kom út á sínum tíma.
Leikfélag Akureyrar, Menningarfélagið Hof og Sinfóníuhljómsveit Norðurlands sameinuðust undir merkjum MAk, Menningarfélags Akureyrar, um síðustu áramót og stendur félagið að uppsetningu verksins.