Channing Tatum dansandi í sjóliðabúningi og Scarlett Johansson fær sér sundsprett - tvær góðar ástæður til þess að skella sér í kvikmyndahús og sjá nýjustu afurð Coen bræðra, Hail, Caesar!.
Það er að minnsta kosti mat George Clooney en hann var meðal gesta á frumsýningu myndarinnar í Los Angeles í gærkvöldi. Clooney leikur í myndinni ásamt fjölmörgum þekktum leikurum. Þeirra á meðal eru auk Tatum og Johansson, Jonah Hill, Tilda Swinton og Josh Brolin.
Um gamanmynd er að ræða þar sem Josh Brolin, sem fer með hlutverk Eddie Mannix sem vinnur í kvikmyndaiðnaðinum í Hollywood á sjötta áratug síðustu aldar, reynir að komast að því hvað kom fyrir einn af leikurum í kvikmynd sem hvarf á meðan á tökum stóð.
Clooney mætti á frumsýninguna ásamt eiginkonu sinni Amal. Hann er góður vinur Joel og Ethan Coen en þeir bæði leikstýra myndinni og semja handritið. Meðal verkefna sem Clooney hefur komið að með þeim eru: Burn after Reading (2008), Intolerable Cruelty (2003) og O Brother, Where Art Thou (2000).
Að sögn Clooney eru bræðurnir fyndnir og vel undirbúnir. Þeir geri frábærar myndir og í raun séu allar myndir þeirra stórkostlegar. „Þeir elska starf sitt svo mikið og það gerir alla hluti mun auðveldari,“ segir Clooney sem er mikill áhugamaður um stjórnmál og fylgdist vel með tölum frá Iowa í gærkvöldi í frumsýningarpartýinu.
Þegar hann heyrði að íhaldsmaðurinn Ted Cruz hafi lagt milljarðamæringinn Donald Trump í forvali repúblikana varð honum að orði: „Þannig að þetta stefnir í áhugavert kosningatímabil.“