Leikarinn Idris Elba var í gær verðlaunaður fyrir hlutverk sitt í kvikmyndinni Beasts of No Nation á kvikmyndahátíðinni Evening Standard sem fram fór í London.
Elba, sem einnig hlaut verðlaun fyrir bestan leik á SAG-verðlaununum fyrir skemmstu, sagði þá meðal annars í ræðu sinni: „Leikstjórinn er hálfjapanskur og hálfbandarískur, tökuliðið kom frá New York og Gana og peningarnir hvaðanæva. Þetta kalla ég fjandans fjölbreytni.“
Eins og kunnugt er voru allir þeir 20 leikarar sem tilnefndir voru til Óskarsverðlauna hvítir á hörund, en fjölmargir telja að Elba hefði átt að vera þeirra á meðal. Þá hafa margir lýst yfir óánægju sinni með einsleitni í tilnefningum, til að mynda leikarahjónin Will og Jada Pinkett Smith sem ætla að sniðganga hátíðina, ásamt leikstjóranum Spike Lee.
Fleiri leikarar fóru heim með verðlaun. Dame Maggie Smith var verðlaunuð fyrir frammistöðu sína í kvikmyndinni The Lady in the Van og ungstirnið Maisie Williams, sem flestir kannast við sem Aryu Stark í þáttunum Game of Thrones, var valin besti nýliðinn.
Frétt Guardian