Katrín, hertogaynja af Cambridge og eiginkona Vilhjálms Bretaprins, prýðir forsíðu júníútgáfu bresku útgáfu tímaritsins Vogue. Tilefnið er aldarafmæli tímaritsins og þetta mun vera í fyrsta skiptið sem hertogaynjan sinnir fyrirsætustörfum af þessu tagi.
Myndirnar tók ljósmyndarinn Josh Olins, þær voru teknar í Norfolk og sýna fyrirsætuna afslappaða í sveitasælunni í látlausum fatnaði.
Í frétt breska ríkisútvarpsins, BBC, segir að myndatakan hafi verið í samráði við National Portrait Gallery, Þjóðlistasafnið sem geymir mannamyndir, en hertogaynjan hefur verið verndari safnsins frá árinu 2012. Myndirnar,sem teknar voru fyrir tímaritið, eru nú til sýnis á safninu.
Með þessu fetar Katrín í fótspor Díönu heitinnar prinsessu, móður Vilhjálms en hún var alls fjórum sinnum á forsíðu breska Vogue.