Áhorf á sjónvarpsþáttinn Top Gear hefur hríðfallið eftir að nýir kynnar tóku við, en Chris Evans og Matt LeBlanc tóku við keflinu af Jeremy Clarkson, James May og Richard Hammond.
Clarkson var á sínum tíma sagt upp störfum eftir að hafa veist að samstarfsmanni sínum, en í kjölfarið sögðu May og Hammond starfi sínu lausu. Þremenningarnir færðu sig síðan yfir til streymisveitunnar Amazon Prime, þar sem þeir munu stýra nýjum bílaþætti.
Frétt mbl.is: Top Gear-tríóið hefur tökur í júlí
Fyrsti þáttur nýrrar þáttaraðar Top Gear fór í loftið í síðustu viku, en 4,4 milljónir manns fylgdust með frumraun Evans og LeBlancs. Þátturinn hlaut fremur neikvæð viðbrögð og var jafnvel kallaður „Flop Gear“ af gárungum á netinu.
Í gær fór síðan annar þáttur í röðinni í loftið, en áhorfið hríðféll á milli vikna, því einungis fylgdust 2,8 milljónir manna með útsendingunni líkt og fram kemur í frétt Mirror.