Poppprinsessan Britney Spears steig á svið á VMA-verðlaununum í gær og hóf upp raust sína, en móttökurnar voru fremur dræmar ef marka má frétt Mirror.
Áhorfendur voru ekki sérlega hrifnir af frammistöðu söngkonunnar og sökuðu margir hana um að hreyfa varirnar í takt við tónlistina, í stað þess að syngja.
Spears steig á svið á eftir Beyoncé, sem spilaði lög af nýjustu plötu sinni, Lemonade. Það þarf því kannski ekki að undra að atriði hennar hafi fallið í skuggann, enda var Beyoncé stjarna kvöldsins að margra mati.
Frétt mbl.is: Beyonce stjarna kvöldsins
Áhorfendur voru duglegir að lýsa skoðun sinni yfir á Twitter, og létu margir móðan mása. Þá veltu sumir því fyrir sér hvers vegna söngkonan hefði haft fyrir því að vera með hljóðnema, á meðan aðrir sögðu engu líkara en hún hefði verið leikmunur rapparans G-Eazy sem tróð upp með henni.