Selena Gomez hefur ákveðið að aflýsa þeim tónleikum sem eftir eru af tónleikaferðalagi hennar, en hún segist þurfa að taka heilsu sína föstum tökum.
Söngkonan greindi frá því á síðasta ári að hún væri haldin sjálfsónæmissjúkdómnum rauðum úlfum, eðe lupus, eftir að hafa haldið sig utan sviðsljóssins um nokkurn tíma.
„Eins og mörg ykkar vita greindi ég frá því á síðasta ári að ég væri haldin lupus, sjúkdómi sem getur haft áhrif á fólk með ýmsum hæti,“ segir í orðsendingu frá söngkonunni sem birtist á vef People.
„Ég hef komist að því að kvíði, ofsahræðsla og þunglyndi getur verið fylgifiskur sjúkdómsins sem getur haft sínar eigin áskoranir í för með sér.“
„Ég vil vera forsjál og einblína á heilsu mína og hamingju, ég hef ákveðið að besta leiðin til þess sé að taka sér frí.“
Tónleikaferðalag stjörnunnar hófst í maí, en því átti að ljúka í desember næstkomandi.