Judge Reinhold handtekinn

Bandaríski kvikmyndaleikarinn Judge Reinhold var handtekinn á flugvelli í borginni Dallas í Texas-ríki í Bandaríkjunum á dögunum eftir að hafa lent í deilu við öryggisverði. Reinhold hefur verið ákærður fyrir óspektir á almannafæri en hann neitaði að sæta aftur öryggiseftirliti eftir að hann hafði verið búinn að fara í gegnum það einu sinni.

Fram kemur í frétt breska ríkisútvarpsins BBC að Reinhold hafi ekki viljað láta leita á sér að sögn yfirvalda en hann er þekktastur fyrir aukahlutverk í kvikmyndum á 9. áratug síðustu aldar eins og Beverly Hills Cop. Samkvæmt upplýsingum BBC viðhafði leikarinn gróft orðbragð og fór úr að ofan til þess að mótamæla frekari öryggisleit.

Lögmaður Reinholds segir leikarann hafa áður farið í gegnum öryggiseftirlitið án athugasemda en síðan verið stöðvaður eftir að taskan hans hafi sett kerfið í gang. Reinhold hafi ekki skilið hvers vegna leita hafi þurft á honum eftir að hafa farið í gegnum öryggiseftirlitið án athugasemda.

Verði leikarinn fundinn sekur á hann yfir höfði sér 500 dollara sekt (um 56 þúsund krónur).

• Blogga um frétt