Íslenska kvikmyndagerðarkonan Sólveig Anspach hlaut frönsku Cesar-verðlaunin í gær fyrir frumsamið handrit að kvikmyndinni The Aquatic Effect, eða Sundáhrifin.
Sólveig, sem lést árið 2015, deilir verðlaunum sínum með Jean Luc-Gaget sem samdi með henni handritið, að því er Hollywood Reporter greindi frá.
Sundáhrifin hlaut einnig verðlaun á kvikmyndahátíðinni í Cannes í fyrra.
Sundáhrifin er tilnefnd sem besta kvikmyndin á Eddu-verðlaununum sem verða afhent annað kvöld. Þar er Sólveig sömuleiðis tilnefnd sem besti leikstjórinn.
Kvikmynd Pauls Verhoeven, Elle, var kjörin besta myndin á Cesar-verðlaununum, auk þess sem aðalleikkona myndarinnar, Isabelle Huppert, var verðlaunuð. Elle hlaut 11 tilnefningar til Cesar-verðlaunanna en hlaut tvenn.