Vona að Úkraínumönnum snúist hugur
Setja bókamerki
Rússnesk stjórnvöld sögðust í dag vona að Úkraínumenn muni endurskoða ákvörðun sína um að banna rússneskri söngkonu að taka þátt í Eurovision vegna illdeilna um Krímskagann.
Aðalkeppni Eurovision fer fram í Kænugarði í maí.
„Frá okkar sjónarhorni er þetta ósanngjörn ákvörðun. Þetta er óheppilegt,“ hefur AFP eftir talsmanni rússneskra stjórnvalda, Dmitry Peskov.
Úkraínska leyniþjónustan setti í gær rússnesku söngkonuna Yuliya Samoilova í þriggja ára inngöngubann til Úkraínu fyrir að hafa farið ólöglega inn á Krímskaga árið 2015.
Rússar vonast til þess að Úkraínumenn snúi ákvörðun sinni við fyrir keppnina í maí svo að Samoilova geti tekið þátt. Peskov gagnrýndi ákvörðunina harðlega og sagði Samoilova „mikilvægan keppanda“ og að ákvörðunin „felli gengi keppninnar“.
Samoilova sagðist í gær bjartsýn á að Úkraínumenn myndu skipta um skoðun. „Yfir höfuð er ég ekki í uppnámi. Ég held áfram. Einhvernvegin held ég að allt muni breytast.“
Hún bætti við að hún sæi ekki hvaða „ógn“ úkraínsk stjórnvöld sæju í „lítilli stelpu eins og mér“.
Rússnesk sjónvarpsstöð lýsti því yfir í gær að ef Rússland fái ekki að taka þátt sé möguleiki á að Rússar muni ekki einu sinni sýna keppnina í sjónvarpi.
Velferð ekki gefin
Quang Le: „Ég gerði ekkert rangt“
Hefði ekki lagst gegn samþykkt sáttmálans
„Staðan er grafalvarleg“
Konur álitnar annars flokks borgarar
Tengsl við undirheima ekki hluti af rannsókninni
Enn langt í að rannsókn málsins ljúki