Gosdrykkjarisinn Pepsi segist hafa tekið umdeilda auglýsingu sína úr dreifingu, þar sem raunveruleikastjarnan Kendall Jenner sést meðal annars ganga í lið með mótmælendum áður en hún færir lögreglumanni Pepsi-dós.
Auglýsingin hefur þótt vægast sagt umdeild og verið höfð að háði og spotti á samfélagsmiðlum, þar sem margir fullyrða að Pepsi sé með auglýsingunni að reyna að græða á baráttu fólks fyrir mannréttindum.
„Pepsi var að reyna að koma á framfæri hnattrænum skilaboðum um samstöðu, frið og skilning. Við misstum augljóslega marks, og biðjumst afsökunar,“ segir í yfirlýsingu frá fyrirtækinu.
„Við ætluðum ekki að grínast með alvörumál. Við erum að fjarlægja efnið og stöðva frekari dreifingu. Við biðjumst einnig afsökunar á því að hafa sett Kendall Jenner í þessa stöðu.“