Breski leikarinn og spaugarinn Ricky Gervais er nú staddur á Íslandi, en hann verður með uppistand í Hörpu í kvöld og annað kvöld. Hann er hér á landi ásamt Jane Fallon, unnustu sinni, og birti á Instagram-síðu sinni í morgun þessa ljósmynd af Fallon kíkja í búðaglugga í miðbæ Reykjavíkur.
Svo virðist sem Gervais þyki full fáir á ferli í miðborginni því hann skrifar með myndinni í lauslegri þýðingu blaðamanns: „Jane, að versla í Reykjavík ásamt öllum vinum sínum.“
Gervais ferðast nú um heiminn með sýninguna Humanity, sem er uppistandssýning hans í sjö ár. Hann kemur fram í Eldborg í Hörpu í kvöld. Strax seldist upp á hana þegar almenn miðasala hófst og var bætt við aukasýningu á morgun, en það er líka uppselt á hana.
Þetta er fimmta uppistandssýning Gervais og hafa hinar gengið mjög vel.