Framhald dans- og söngvamyndarinnar Mamma Mia, sem sló í gegn um allan heim fyrir áratug, er í undirbúningi og hafa leikararnir Meryl Streep, Amanda Seyfried, Pierce Brosnan og Colin Firth samþykkt að endurtaka leikinn.
Fyrri myndin byggði á samnefndum söngleik sem var fyrst settur upp á Broadway í New York. Söngleikurinn var frumsýndur hér á landi í mars í fyrra og er enn sýndur fyrir fullu húsi. Þetta ættu því að vera gleðitíðindi fyrir landsmenn.
Sem fyrr verður tónlist sænsku popphljómsveitarinnar ABBA í forgrunni, m.a. lög sem náðu ekki að hljóma í fyrri myndinni, að því er fram kemur á vef breska ríkisútvarpsins.
Stefnt er að því að frumsýna kvikmyndina, sem ber heitið Mamma Mia: Here We Go Again, í júlí 2018. Kvikmyndagerðarmaðurinn Ol Parker mun skrifa handritið og leikstýra myndinni.
Þeir Benny Andersson og Björn Ulvaeus, liðsmenn ABBA, munu framleiða myndina.