Kardashian með Kennedy skart

Cartier armbandsúr Jackie Kennedy seldist fyrir 50 milljónir króna á uppboði í New York borg en það var raunveruleikastjarnan Kim Kardashian sem var með hæsta boð.

Úrið er 18 karata gull og frá árinu 1962, sem er ári eftir að Kennedy varð forsetafrú Bandaríkjanna og ári áður en maður hennar var myrtur.

Áætlað verð á úrinu var á bilinu 6 - 12 milljónir en Kardashian bauð vel yfir verðið og setti nýtt met þar sem þetta er dýrasta Cartier úr sem selst hefur. Upprunalega kostaði úrið aðeins nokkra hundruð dollara, eða um 30 þúsund krónur.  

Raunveruleikastjarnan bauð nafnlaust í úrið en Kardashian hefur talað mikið um það í fjölmiðlum að hún ætli að vera með minna áberandi skartgripi eftir að hún varð fórnalamb vopnaðs ráns í október síðastliðnum.  

Úrið fékk Kennedy sem gjöf frá mági sínum til að minnast göngu sem hann gekk fyrir hönd forsetans. Gangan var hluti af herferð forsetans að hvetja almenning til að hreyfa sig meira og hafði forsetafrúin hvatt mág sinn til að taka þátt.