Létu karlrembu ekki stoppa sig

Athafnakonur sem þurftu að þola mikið kynjamisrétti á starfsferli sínum gáfu út bók sem selst betur en mest selda bók í heimi, Harry Potter.

Enginn fjárfestir tók Elenu Favili og Francescu Cavallo alvarlega þar sem þeir blikkuðu þær og gerðu grín að þeim á fundum.

Þær létu það samt ekkert á sig fá og ákvaðu að gefa út bækur sínar sjálfar án hjálpar útgefanda eða fjárfesta. Nú selst bók þeirra svo hratt að hún er á lista yfir mest seldu bækur í Bretlandi.

Bókin ber heitið Kvöldsögur fyrir óvenjulegar stelpur og inniheldur 100 sögur af kraftmiklum konum frá mismunandi löndum, tímum og ferlum. Til dæmis má nefna sögur af Serena Williams, Kleópötru og Malala Yousafzai.

Bók númer tvö er á leiðinni með sögur af meðal annars Beyoncé og J.K Rowling.

Elena og Fransesca sögðu í viðtali við DailyMail að þær vonuðu að sögurnar veiti ungum stelpum innblástur til að berjast fyrir draumum sínum og trúa á sjálfar sig.

Þær bættu við að flestallar barnasögur feli í sér miklar staðalímyndir um það hvernig strákar eiga að vera og stelpur eiga að vera og innihalda sjaldan sögur af kraftmiklum konum.