Banna Despacito

Yfirvöld í Malasíu hafa bannað spænska lagið Despacito, sem heyrst hefur á öllum útvarpsstöðvum og skemmtistöðum í sumar og er nú mest spilaða lag allra tíma. Þetta hefur AFP-fréttastofan eftir Salleh Said Keruak, samgöngu- og samskiptaráðherra landsins.  

Sagði ráðherrann lagið vera „óíslamskt“, en meirihluti íbúa Malasíu er múslimar og því hefði ráðuneyti hans ákveðið að banna ríkisreknum útvarpsstöðvum að spila lagið.

„Despacito verður ekki spilað á stöðvum í eigu ríkisins af því að okkur hafa borist kvartanir frá almenningi. Texti lagsins er ekki þess eðlis að hann eigi að heyrast,“ sagði Salleh og kvaðst vonast til að einkareknar útvarps- og sjónvarpsstöðvar fylgi þessu fordæmi.

„Við hvetjum einkareknar malasískar stöðvar til að ritskoða sjálfar sig,“ bætti hann við.

Texti Despacito, sem upphaflega var sungið af púretóríska rapparanum Daddy Yankee, geymir margar kynferðislegar tilvísanir. Eftir að lagið var endurútgefið í janúar í flutningi þeirra Justin Bieber, Daddy Yankee og Luis Fonsi hefur það verið spilað 4,6 milljarða skipti.

• Blogga um frétt