Sakaðir um að hvítþvo Beyoncé

Beyoncé er ein af þekktustu manneskjum heims og er erfitt að finna vestræna manneskju sem þekkir hana ekki. Þrátt fyrir það lítur út fyrir að starfsmenn vaxmyndasafnsins Madame Tussauds viti ekkert hvernig söngkonan lítur út.

Vaxmyndasafnið tilkynnti í gær á Twitter-síðu sinni að þeir hefðu fært styttu söngkonunnar frá London til New York og hvöttu aðdáendur hennar til þess að kíkja við og sjá hana. En tilkynningin fékk ekki jákvæð viðbrögð þar sem aðdáendum söngkonunnar fannst styttan ekkert líkjast Beyoncé.

Margir notendur sökuðu hönnuði styttunnar um að hafa „hvítþvegið“ Beyoncé þar sem vaxmyndin af söngkonunni er frekar ljós á hörund. 

Aðrir sögðu hana mun líkari Britney Spears, Lindsay Lohan eða jafnvel Taylor Swift. 

• Blogga um frétt