Leikarinn Jeffrey Tambor hefur ákveðið að hætta að leika Mauru Pfefferman, aðalhlutverkið í sjónvarpsþáttunum Transparent. Ákvörðunina tók hann eftir að hann var sakaður um kynferðislega áreitni.
Í yfirlýsingu Tambor til Variety kemur fram að honum þyki leitt ef gjörðir hans hafi verið mistúlkaðar en hann segist ekki hafa áreitt neinn. Málin hafa haft áhrif á vinnuumhverfi og sér hann því ekki hvernig hann getur mætt aftur í vinnu.
Amazon, framleiðandi þáttanna, hóf rannsókn í kjölfar ásakananna en fyrrverandi aðstoðarkona Tambors, transkonan Van Barnes, áskaði hann um kynferðislega áreitni fyrr í mánuðinum. Í síðustu viku steig svo fram Trace Lysette, gestaleikkona í þáttunum.